Lotto- u Schpaghetti Plousch

Lotto- u Spaghetti-Plousch isch das Jahr am 11. März agseit. O das Jahr hei mir dä Alass im Pfadiheim Kuonolf ds Chonufinge– Dorf düregfühert. Wi geng gö Kathrin Hirschi u d Margrith Wüethrich d Priese ga ichoufe, si müesse uf ds Bütsche achtig gäh, nid das es plötzlich übezoge wird. U de gits süsch no auerhand vorzbereite. Am Frytig: Soose zwäg mache, Schpaghetti plodere, Salat vorbereite etc. Wiu mir ersch am Samschtig vormitag ids Huus chöi, tüe mir das daheime vorbereite. Am Samschtig morge, wo mir ids Pfadiheim chöme, mues zersch gheizt wärde, es isch nume 9 Grad warm, für d Pryse vorzbereite geits grad, we me ä Chutte anhet u me d Chape übere Gring ache schrysst. Namittag si de üser Lüt langsam itrudlet u am drü hei mir de chönne afa Lotto schpiele. Es het acht Gäng u zwöi mau d Charte vou gä.

Es isch luschtig zu u här gange. Zwüsch düre het der Spiker müesse usgwächslet wärde, wiu ds einte oder ds anger säute het chönne Gartong rüefe, oder es het o gheisse du musch lings töif ache recke, de chunts guet, aber o das het de nid geng gnüzt, aber d Priese si de schlussamänt aui unger d Lüt cho. Uf di haub sächsi hets de z Nacht gä, äbe Spaghetti-Bolonese, Cinque-pi, Tomate mit Thon, ganz gwöhnlechi Tomate Sosse u Pestososse, aui hei gnue übercho u es het se guet düecht. Wis so gang u gäb isch, si üser Froue derfür besorgt, dass es zum Dessär Bachnigs git u für Kaffi isch o gsorget. Langsam geit dä gmüetlech Alass z änd, üser Lüt gö süferli heizue u zletsch müesse mir no hurti der Bode putze, das geit am gäbigschte we nümme viu Lüt ume si. Merci aune wo vorbereitet hei, de Beckerinne/Becker u aune wo mitgmacht hei. Teil gno hei Naturfründe vo Gwatt u Chonufinge, totau si 24 Spilerinne/Spiler Ching u Jugendlechi awäsend gsy.

– Ruedi